Vendimi final i Robert Lewandowski për të ardhmen e tij po afrohet, ndërsa sulmuesi polak mund të largohet nga Barcelona në fund të këtij sezoni.

Kontrata e tij skadon më 30 qershor dhe deri tani nuk ka marrëveshje për rinovim, pasi klubi katalanas i ka ofruar një kontratë me kushte financiare më të ulëta krahasuar me këtë sezon.

Sipas mediave italiane, interesimi për “Lewy”-n ka qenë i vazhdueshëm muajt e fundit, me Juventus që aktualisht duket më e vendosur për ta transferuar sulmuesin veteran.

“Zonja e Vjetër” thuhet se i ka ofruar një kontratë njëvjeçare me vlerë rreth 6 milionë euro neto, plus bonuse shtesë.

Raportohet se drejtuesit në Torino e shohin veten në avantazh për transferimin e 37-vjeçarit, por gjithçka mbetet e hapur.

Sipas Mundo Deportivos, deri tani nuk ka një vendim përfundimtar dhe interesimi i Juventusit shihet më shumë si dëshirë e klubit italian.

Në javën e ardhshme pritet që agjenti i tij, Pini Zahavi, të mbërrijë në Barcelonë për të diskutuar me drejtuesit e klubit për të ardhmen e sulmuesit.

Përveç Juventusit, interesim për Lewandowskin kanë shfaqur edhe AC Milan, si dhe disa klube nga Arabia Saudite.

E ardhmja e sulmuesit mbetet e hapur, ndërsa vendimi përfundimtar pritet të merret shumë shpejt./Arbresh.info