Mason Greenwood mund të jetë pranë një aventure të re në karrierë, pasi interesimi i Fenerbahçes për sulmuesin anglez po bëhet gjithnjë e më konkret.

Sipas raportimeve të mediave ndërkombëtare, gjiganti turk ka avancuar ndjeshëm në bisedimet me Olympique Marseille dhe është afër arritjes së një marrëveshjeje për transferimin e 24-vjeçarit.

Negociatat mes dy klubeve kanë qenë aktive që nga përfundimi i sezonit 2025/26, ndërsa së fundmi palët kanë bërë hapa të rëndësishëm drejt finalizimit të operacionit. Greenwood raportohet se është i gatshëm të nënshkruajë një kontratë katërvjeçare me klubin nga Stambolli, ku do të përfitojë rreth 10 milionë euro neto në sezon.

Sulmuesi anglez iu bashkua Marseilles në verën e vitit 2024 pas largimit nga Manchester United. Në marrëveshjen e transferimit ishte përfshirë edhe një klauzolë që i garanton klubit anglez një përqindje nga shitja e ardhshme e lojtarit, çka do t’i sillte përfitime financiare edhe “Djajve të Kuq” në rast të kalimit te Fenerbahçe.

Greenwood pati një sezon të jashtëzakonshëm me skuadrën franceze gjatë edicionit 2025/26. Ai realizoi 26 gola dhe regjistroi 11 asistime në 45 paraqitje në të gjitha garat, duke u shndërruar në një nga sulmuesit më të spikatur dhe më të kërkuar në tregun evropian të transferimeve.