Më 20 tetor, Hansi Flick bëri një deklaratë të papritur dashurie për Barcelonën: “Ky klub më ka ndryshuar”, tha ai. Dhe këtë e plotësoi të martën në sallën e shtypit të stadiumit Jan Breydel, në prag të ndeshjes kundër Club Brugge: “E dua këtë klub, lojtarët dhe tifozët e tij”. Kaq shumë fjalë të ëmbla nga një trajner zakonisht aq i ftohtë ngritën disa dyshime. Disa e panë si shenjë të sinqertë ndjenje, të tjerë si një hap të parë drejt një lamtumire të mundshme.

Në këtë linjë, gazeta ABC publikoi të martën se Flick u kishte thënë ndihmësve të tij se është “shumë i lodhur” dhe se ka vendosur të largohet. Artikulli vinte në qendër të vëmendjes Lamine Yamal, duke pretenduar se klubi i lejon “çdo lloj kapriçie” dhe se ekipi tregohet “i shpërqendruar” në mbështetjen e tij. Burime pranë Flick, megjithatë, e mohuan plotësisht këtë informacion, duke e quajtur “plehra” dhe të pavërtetë.

Të mërkurën në mesditë, presidenti i Barcelonës, Joan Laporta, foli për të dy emrat Flick dhe Lamine.

“E di që Flick ndihet mirë te Barça dhe është i emocionuar që do të rikthehet në Spotify Camp Nou si trajner i klubit që do të inaugurojë stadiumin e ri me 105.000 spektatorë”, tha Laporta me nxitim, ndërsa largohej nga grupi i gazetarëve, pasi më herët kishte dhënë vetëm katër përgjigje.

Për Lamine Yamal, Laporta u shpreh edhe më prerë.

“Lamine është një gjeni dhe unë do ta mbroj. Jam në anën e tij dhe do ta mbështes. Është një lojtar i jashtëzakonshëm që kemi pasur fatin ta rritim vetë. Ajo që do të bëj është ta mbroj dhe të jem i përafruar me të. Është vetëm 18 vjeç dhe fama i ka ardhur papritur. Nuk është e lehtë për t’u përballuar, por ai e menaxhon me natyrshmëri. Po punon shumë dhe kjo është e admirueshme. E kam parë procesin e tij të rikuperimit dhe, njësoj si Gavi, po përpiqet maksimalisht me stafin e rikuperimit.”/Arbresh.info