Joan Laporta është paraqitur në Auditori 1899 me autobusin e tij elektoral dhe sloganin “Ta mbrojmë Barçën”, duke konfirmuar zyrtarisht kandidaturën për presidencën e FC Barcelona.

Laporta dorëzoi 8.171 nënshkrime të anëtarëve të klubit, rreth 2 mijë më pak se 10.272 që kishte mbledhur pesë vite më parë, por afro 3.000 më shumë se rivali i tij Víctor Font, i cili kishte siguruar 5.140 firma.

Në fjalimin e tij para mediave dhe mbështetësve, Laporta u bëri thirrje anëtarëve të klubit që ta mbështesin sërish, duke mbrojtur punën e bërë gjatë mandatit të tij dhe duke paraqitur vizionin për të ardhmen.

“Barça që duam do të ketë stadiumin e përfunduar, i cili do të bëhet më i madhi në Evropë me 105.000 vende dhe një perlë arkitekturore për futbollin botëror. Gjithashtu kemi planifikuar ndërtimin e Palau të ri, që do të jetë një tjetër vepër madhështore dhe do të tërheqë shumë njerëz”, deklaroi Laporta, duke iu referuar projekteve infrastrukturore, përfshirë modernizimin e Camp Nou dhe ndërtimin e Palau Blaugrana.

Laporta gjithashtu vuri theks në projektin sportiv, duke lavdëruar strukturën aktuale të klubit. “Me Hansi Flick në fushë dhe Deco në zyra, së bashku me përforcimet e nevojshme, synojmë të kemi skuadrën më të vlerësuar në botë, por gjithmonë duke respektuar filozofinë krujfiste”, theksoi ai, duke iu referuar trashëgimisë së Johan Cruyff.

Në fund, kandidati për president garantoi lidership të fortë dhe stabilitet për klubin në pesë vitet e ardhshme.

“Klubi do të ketë një president dhe një bord drejtues që marrin përgjegjësi, udhëheqin dhe marrin vendime të përbashkëta. Kemi fituar përvojë të madhe dhe jam i bindur se nëse anëtarët na besojnë, do të jetojmë një periudhë të re të lavdishme”, përfundoi Laporta.

Zgjedhjet për presidencën e Barcelonës pritet të jenë vendimtare për të ardhmen sportive dhe financiare të klubit katalanas.