Pas eliminimit tronditës në Liga e Kampionëve në mesjavë nga Ajaxi, Juventusi ka siguruar tani për të tetën herë rresht titullin e kampionit në Serie A.

Me fitoren 2 me 1 pasditen e sotme (e shtunë) kundër Fiorentinas, “Zonja e Vjetër” ka mbrojtur titullin e kampionit edhe për një vit tjetër, shkruan portali arbresh.info.

Gjiganti italian pësoi pas vetëm gjashtë minutave lojë në stadiumin Allianz ku Nikola Milenkovic dërgoi në avantazh skuadrën e Fiorentinas, por Alex Sandro me një gol të bukur riktheu në lojë skuadrën e Max Allegrit duke barazuar gjithçka në minutën e 37′ me golin me kokë.

Edhe pse iu mjaftonte vetëm një pikë, “Bianconerët” gjetën golin e epërsisë pas një pasimi në zonë nga Cristiano Ronaldo të cilin pa dashje e dërgoi një rrjetë mbrojtësi i skuadrës mysafire German Pezzella duke i dhuruar autogol nikoqirëve në minutën e 53′.

Juventusi ka 87 pikë, 20 më shumë se Napoli në pozitën e dytë si rivali më i afërt, dhe është shpallur matematikisht kampion derisa kanë mbetur katër ndeshje për tu zhvilluar./arbresh.info/