Anësori i Manchester Cityt, Jeremy Doku, është gati t’u ofrojë tifozëve një vështrim të rrallë dhe të pafiltruar në jetën e një futbollisti profesionist – dhe kjo nuk ka të bëjë vetëm me pushimet luksoze apo makinat sportive.

Ylli belg ka njoftuar nisjen e kanalit të tij në YouTube, por ndryshe nga përmbajtja e zakonshme e lojtarëve, Doku synon të sjellë realitetin e përditshëm të jetës së një sportisti elitar.

“Në jetën tonë si futbollistë, njerëzit kanë një perceptim të caktuar për mënyrën si është kjo jetë”, deklaroi Doku.

“Kur futbollistët tregojnë jetën e tyre, shpesh shfaqin vetëm anën e bukur: pushimet, paratë, momentet e lumtura. Por kjo është vetëm 10 për qind e realitetit. Ata nuk tregojnë momentet e vështira”.

Përmes videoserive të tij, Doku do të dokumentojë të përditshmen e një futbollisti – nga seancat e hershme të stërvitjes dhe përballja me dëmtimet, deri te emocionet e ndeshjeve të mëdha.

Kanali do të ofrojë gjithashtu pamje nga jeta brenda skuadrës së Manchester Cityt, duke i afruar tifozët me atmosferën dhe shoqërinë që krijohet prapa skenave.

Kjo është një qasje ndryshe nga një prej talenteve më të rinj dhe emocionues të Cityt, i cili dëshiron të tregojë anën njerëzore të futbollit, përtej shkëlqimit që zakonisht shfaqet në rrjetet sociale. /Telegrafi/