Shqipëria nesër përballet me Gjeorgjinë nesër në Tbilisi në ndeshjen e katërt në kuadër të Ligës së Kombeve.

Sfida fillon nga ora 18:00 në stadiumin “Mikheil Meskhi”, shkruan Arbresh.info.

Para kësaj sfide ka folur qendërmbrojtësi shqiptar, Ardian Ismajli, i cili po kalon në formë të shkëlqyer me skuadrën e tij Empoli në Serie A.

Ai tha se në Tbilisi janë vetëm për të marr fitore dhe asnjë rezultat tjetër.

“Ne kemi ardhur këtu për tre pikë, nuk ka rrugë tjetër për të mbajtur deri në fund garën e hapur. Besoj se nesër do të dalim me tre pikë nga ky stadium. Kemi dy humbje në dy ndeshjet e fundit, por kur i sheh ndeshjet sesi shkuan, me Gjeorgjinë nuk e merituam humbjen. Do të shohim përpara, vetëm fitorja na bën punë tani. Stafi e ka analizuar me kujdes Gjeorgjinë, pikat e forta dhe pikat e dobëta, besoj se do të dalim me sukses nesër”, tha Ismajli.

Shqipëria aktualisht ndodhet në pozitën e tretë në grup me tre pikë kurse Gjeorgjia është e para me gjashtë sosh./Arbresh.info