Ish-futbollisti i kombëtares së Belgjikës, Eden Hazard, ka deklaruar se nuk është i befasuar nga puna që po bën ish-bashkëlojtari i tij Vincent Kompany si trajner i FC Bayern Munich.

Në një intervistë për transmetuesin publik belg RTBF, ish-ylli i Real Madrid CF, Chelsea FC dhe Lille OSC vlerësoi shumë trajnerin e Manchester City, Pep Guardiola, duke e quajtur atë ndoshta trajnerin më të mirë në historinë e futbollit.

“Ka qenë një lojtar i nivelit të lartë. Por nëse do të bëhej një nga trajnerët më të mirë në botë, kjo nuk dihet kurrë. Gjatë karrierës së tij ai kaloi shumë vite me atë që ndoshta është trajneri më i mirë në histori, Pep Guardiola”, u shpreh Hazard.

Hazard, i cili gjatë karrierës së tij ka punuar me trajnerë të njohur si José Mourinho, Antonio Conte, Maurizio Sarri, Zinedine Zidane dhe Carlo Ancelotti, tha se gjithmonë ka besuar se Kompany kishte të gjitha cilësitë për t’u bërë një trajner i mirë.

“Ka përjetuar shumë eksperienca me Manchester Cityn, ka luajtur në Belgjikë dhe në Gjermani. Gjatë karrierës së tij ka grumbulluar shumë përvojë. Ai di gjithçka për futbollin dhe kjo nuk më habit. Ka edhe personalitetin e duhur për të thënë gjërat siç janë dhe ka mentalitet fitues”, shtoi ish-kapiteni i Belgjikës.

Sipas Hazard, në të ardhmen Kompany mund të bëhet edhe përzgjedhës i kombëtares së Belgjikës, por ai beson se kjo nuk duhet të ndodhë së shpejti.

“Do të ishte një përzgjedhës shumë i mirë i Belgjikës, këtë e them 100 për qind. Por nuk dua ta shoh tani në atë rol. Dua ta shoh çdo ditë në punë me Bayernin ose me ndonjë klub tjetër të madh, si Manchester City. Vincent ende nuk i ka mbushur 40 vjet dhe nuk e shoh në stolin e Belgjikës në katër ose pesë vitet e ardhshme”, përfundoi Hazard./Arbresh.info