Fituesi i Kupës së Botës 2026, që do të zhvillohet në SHBA, Kanada dhe Meksikë, do të përfitojë një shpërblim rekord prej 37.5 milionë paundësh, ka konfirmuar FIFA.

Vendimi u miratua në mbledhjen e Këshillit të FIFA-s në Doha, vetëm pak orë para mbrëmjes vjetore të çmimeve.

Në total, fondi i shpërblimeve për kombëtaret pjesëmarrëse do të arrijë në 545 milionë paund, rreth 50 për qind më shumë se në Botërorin e Katarit katër vite më parë.

Njoftimi vjen një ditë pasi FIFA u detyrua të reagojë ndaj zemërimit të tifozëve për çmimet e larta të biletave.

Javën e kaluar, tifozët u revoltuan kur u publikuan çmimet fillestare, me biletën më të lirë për ndeshjen hapëse të Anglisë ndaj Kroacisë që shkonte në 200 paund, ndërsa një vend në finalen e turneut kushtonte mbi 4,000 paund.

Pas presionit, FIFA konfirmoi se rreth 10 për qind e biletave për çdo kombëtare do të ofrohen me çmim të reduktuar prej 45 paundësh. Në rastin e Anglisë, këto bileta do të jenë të disponueshme për të gjitha ndeshjet dhe do t’u jepen anëtarëve të klubit zyrtar të tifozëve.

Edhe pse numri është i kufizuar, ky vendim konsiderohet një fitore e rëndësishme për tifozët.

Vendimi erdhi pas bisedimeve mes FIFA-s dhe federatave anëtare, përfshirë Federatën Angleze dhe atë Gjermane.

“Tifozët e kombëtareve të kualifikuara do të përfitojnë nga një kategori e re biletash, e krijuar për ta bërë ndjekjen e ekipit më të përballueshme. ‘Supporter Entry Tier’ do të kushtojë 60 dollarë për ndeshje, përfshirë edhe finalen”, deklaroi një zëdhënës i FIFA-s./Arbresh.info