Gjatë ditës së sotme ka mbaruar edhe xhiroja e fundit e sezonit vjeshtor në Superligën e Kosovës në futboll, ku Drita e Ballkani triumfuan ndeshjet e tyre përkatëse.

Gjilanasit fituan me shumë mund ndaj Feornikelit ’74 me rezultat 2-1, shkruan Arbresh.info.

Kurse, fitore gjatë ditës së sotme fitoi edhe Ballkani në derbin lokal ndaj Suharekës me rezultat 0-2.

Gjatë ditës së shtunë u luajtën edhe dy ndeshje tjera me Prishtinën që luajti baras me Malishevën pa gola 0-0 në kryeqytet.

Kurse fitore të rëndësishme ditën e djeshme shënoi Ferizaj që e mposhti skuadrën e Gjilanit me rezultat 3-1 dhe iku nga zona e rrezikut për të rënë në Ligën e Parë.

Ndërsa ndeshja hapëse e xhiros së 18-të mes Llapit e Dukagjinit u mbyll pa gola 0-0.

Pas 18 javësh, Drita është në krye të tabelës me 40 pikë dhe e mbyll stinorin vjeshtor si kampione e Kosovës. Ndjekësi i parë i “Intelektualëve” është Ballkani me 33 sosh. Kurse top treshen e mbyll, Malisheva me gjithsej 30 pikë.

Prishtina është e katërta me 27 sosh, kurse në vendin e pestë është Suhareka me dy më pak, Gjilani është i gjashti me 21 ndërsa Dukagjini ka po aq pikë dhe renditet i shtati.

Pozitën e barazhit e mban Ferizaj me 20 pikë, ndërsa Llapi është befasia e këtij gjysmëkampionati duke u renditur në vendin e nëntë në tabelë me 18 pikë dhe rrezikuar rënien në Ligën e Parë.

I fundi në tabelë është Feronikeli ’74 me 10 pikë./Arbresh.info