Drejtori ekzekutiv i FIBA Evropës, Kamil Novak, ka vizituar sot Kosovën, me ç’rast është pritur nga presidenti i Komitetit Olimpik të Kosovës, Ismet Krasniqi dhe sekretari i përgjithshëm, Besim Aliti.

Krasniqi falënderoi drejtorin Novak për vizitën dhe përkrahjen që po i jep basketbollit tonë, ndërsa shprehu vullnetin dhe gatishmërinë e KOK-ut për të fuqizuar edhe më tutje bashkëpunimin me FBK-në për të avancuar basketbollin në Kosovë.

Drejtori ekzekutiv, Novak, që shoqërohej nga drejtuesit e FBK-së, kryetari Arben Fetahu e sekretarja e përgjithshme, Elvira Dushku, falënderoi presidentin Krasniqi për mikpritjen dhe bashkëpunimin e ngushtë që ka me FBK-në.

Drejtori Novak do të jetë i pranishëm në ndeshjen Kosova-Malta që zhvillohet në kuadër të Kampionatit Evropian, Divizioni C për meshkuj U16, që sot nis në Prishtinë, ndërsa më pas do të ndjek edhe takimin e parë parakualifikues për Evropianin 2025, ndërmjet Kosovës dhe Zvicrës, që zhvillohet në Prizren./Arbresh.info/