De Rossi debuton me fitore në stolin e Romës, mposhtin Hellas Veronën në shtëpi

Roma ka shënuar fitore me rezultat 2-1 në shtëpi ndaj Hellas Veronës, në kuadër të xhiros së 21-të në elitën e futbollit italian.

Golin e epërsisë Romës ia dha Romelu Lukaku (19’) i cili shënoi nga afërsia për 1-0 pas asistimit të Stephan El Shaarawy.

Pak minuta më vonë, El Shaarawy ishte përsëri protagonist me një asistim tjetër, kësaj radhe për Lorenzo Pellegrinin (25’) i cili me një goditje fantastike arriti të shënoj për 2-0.

Lojtarët e Romës kërkuan penallti në minutën e 31-të, mirëpo pas rishikimit në VAR gjyqtari vendosi që gjithçka ishte e rregullt.

Hellas Verona (56’) arriti që të barazojë shifrat, mirëpo pas rishikimit nga VAR-i, u anulua për shkak të një faulli gjatë aksionit.

Mysafirët fituan një penallti, të cilën nuk arriti që ta konkretizojë në gol Milan Duric (66’).

Sidoqoftë, Hellas Verona e gjeti golin në minutën e 76-të me anë të Michael Folorunshos i cili realizoi për 2-1.

Deri në fund të takimit nuk pati më raste të mira dhe Roma mori fitoren e parë nën drejtimin e trajnerit Daniele De Rossi.

Roma tani gjendet në pozitën e shtatë me 32 pikë të grumbulluara dhe ende mban gjallë shpresat për kualifikim në garat evropiane./Telegrafi/