Chelsea rrit ofertën për Mike Maignan në 21 milionë euro, sipas Gianluca Di Marzio marrëveshja mund të mbyllet para Kupës së Botës për Klube.

Sipas gazetarit të Sky Sport Italia, Gianluca Di Marzio, Chelsea ka rritur ofertën e saj për portierin e Milanit, Mike Maignan, në 21 milionë euro, dhe kjo shumë mund të jetë e mjaftueshme për të finalizuar marrëveshjen përpara nisjes së Kupës së Botës për Klube.

Nuk është më sekret se portieri francez beson se koha e tij në ‘San Siro’ ka përfunduar dhe dëshiron të largohet, pjesërisht për shkak të zhgënjimit që kontrata e re, e dakordësuar në mars, nuk u firmos kurrë nga klubi.

Milani vendosi të mos e finalizojë marrëveshjen, ndërsa kontrata aktuale e Maignan skadon në qershor të vitit 2026.

Tani, lojtari ka vendosur të transferohet te Chelsea dhe e ka zemrën te ky transferim.

Oferta fillestare prej 15 milionë eurosh plus bonuse u refuzua nga Milani, por Sky Sport Italia raporton se pas negociatave intensive telefonike gjatë mbrëmjes së djeshme, Chelsea e ka rritur ofertën në 21 milionë euro.

Mbetet për t’u parë nëse kjo do të mjaftojë për të bindur Milanin, i cili deri tani ka kërkuar 25 milionë euro.

Megjithatë, ‘Rossonerët’ janë të vetëdijshëm se rrezikojnë ta humbasin Maignan si lojtar i lirë verën e ardhshme./Telegrafi/