Manchester United është gati të shpallë Michael Carrick si trajner të përkohshëm të skuadrës brenda 48 orëve të ardhshme, pas përparimit të bisedimeve, raporton Daily Mail Sport.

Ish-mesfushori i “Djajve të Kuq” ka qenë sot në qytet për të finalizuar marrëveshjen, e cila do ta shihte atë të marrë drejtimin e skuadrës në “Old Trafford” për pjesën e mbetur të sezonit, pas shkarkimit të Ruben Amorimit.

Aktualisht, bisedimet po përqendrohen në formimin e stafit teknik që do ta shoqërojë Carrick.

Për këtë arsye, një njoftim zyrtar nuk pritet të bëhet sot, pasi disa detaje janë ende duke u sqaruar.

Megjithatë, shpresa e klubit është që Carrick dhe ekipi i tij të jenë gati për të drejtuar seancën stërvitore të së mërkurës, kur lojtarët e United rikthehen pas një pushimi dyditor.

Pas ndarjes së rrugëve me Amorimin, drejtuesit e Manchester United kanë zhvilluar bisedime si me Michael Carrick ashtu edhe me Ole Gunnar Solskjaer. Sipas raportimeve, Carrick ka lënë përshtypje pozitive dhe është parë si opsioni më bindës.

Në ndërkohë, Darren Fletcher, ish-shok skuadre i Carrick, ka drejtuar ekipin në dy ndeshje, një barazim 2-2 ndaj Burnleyt dhe një humbje zhgënjyese në shtëpi në FA Cup kundër Brighton & Hove Albion.

Michael Carrick, 44 vjeç, ka fituar pesë tituj të Premier League si lojtar i Manchester United përpara se të tërhiqej nga futbolli në vitin 2018. Ai ka pasur edhe një periudhë të shkurtër si trajner kujdestar i United pas largimit të Solskjaerit dhe para ardhjes së Ralf Rangnick.

Në karrierën e tij si trajner, Carrick drejtoi Middlesbrough, ku në sezonin e parë e nxori ekipin nga zona e rënies dhe e çoi deri në “play-off”. Në sezonin pasues, Boro arriti në gjysmëfinale të Kupës së Ligës, por Carrick u shkarkua verën e kaluar pas përfundimit të kampionatit në vendin e 10-të.

Tashmë, gjithçka pritet të zyrtarizohet shumë shpejt, me Carrick që është gati të rikthehet në “Old Trafford”, këtë herë si trajner./Arbresh.info