Bologna ka bërë një tjetër paraqitje të madhe në gjysmëfinalen e Kupës së Italisë, duke mposhtur Empoli edhe në ndeshjen e kthimit dhe siguruar biletën për në finale.

Pas fitores bindëse 3:0 në takimin e parë, skuadra që në këtë edicion ishte pjesë edhe e Champions League e ka konfirmuar formën edhe të enjten mbrëma, duke fituar 2:1 në “Stadio Renato Dall’Ara”, për një rezultat të përgjithshëm 5:1 në dy ndeshje.

Ndeshja ka nisur më mirë për vendasit, që kanë kaluar në epërsi qysh në minutën e shtatë me golin e Giovanni Fabbian.

Empoli ka arritur ta rikthejë baraspeshën përkohësisht me golin e Viktor Kovalenko në minutën e 33-të, por Bologna e ka vulosur fitoren në minutën e 86-të me një gol të Thijs Dallinga.

Bologna tash do të përballet në finalen e madhe më 14 maj me Milan.