Në Gjermani po shtohen zërat që e lidhin Nico Schlotterbeck me një transferim të mundshëm te Real Madridi.

Sipas raportimit të Bild, e ardhmja e mbrojtësit qendror të Borussia Dortmundit ka hyrë në një fazë vendimtare, ndërsa klubi madrilen shihet si kandidati më serioz për të siguruar shërbimet e tij, shkruan Arbresh.info.

Schlotterbeck ka kontratë me BVB-në deri në vitin 2027, por drejtuesit e klubit gjerman po shqetësohen se ai mund të largohet pa pagesë në fund të kontratës. Për këtë arsye, nuk përjashtohet mundësia që Dortmundi ta nxjerrë në shitje që verën e ardhshme.

Situata në tregun e transferimeve e përforcon edhe më shumë këtë skenar. Bayern Munich, që konsiderohej një tjetër destinacion i mundshëm për Schlotterbeck, është pranë rinovimit të kontratës me Dayot Upamecano, çka ul nevojën e bavarezëve për përforcime në qendër të mbrojtjes.

Kjo e rikthen Schlotterbeck-un në krye të listës së Real Madridit, i cili po shqyrton opsione për të ardhmen e repartit defensiv, sidomos në rast të një largimi të mundshëm të Antonio Rüdiger. Në perëndim të Gjermanisë janë të vetëdijshëm për interesimin dhe, sipas Bild, pranojnë se pista madrilene po fiton gjithnjë e më shumë terren.

Megjithatë, Dortmundi nuk pritet ta lehtësojë transferimin. Klubi e vlerëson reprezentuesin gjerman mbi 50 milionë euro dhe po vazhdon bisedimet për rinovimin e kontratës, duke e konsideruar Schlotterbeckun si një shtyllë kryesore të projektit sportiv.

Vetë lojtari ende nuk ka marrë një vendim përfundimtar dhe po i shtyn afatet përpara se të përcaktojë të ardhmen e tij./Arbresh.info