Ballkani ka shënuar një fitore të thellë me rezultat 3-0 ndaj Drenicës, në kuadër të xhiros së katërt në Superligën e Kosovës.

Goli i parë erdhi në fundin e pjesës së parë nga sulmuesi Serebe, shkruan Arbresh.info.

Me të filluar pjesa e dytë saktësisht në minutën e 48-të, ai shënoi edhe golin e dytë personal dhe për Ballkanin, për ta dyfishuar epërsinë.

Ndërsa në minutën e katërt të shtesës, Serebe kompletoi hattrickun dhe vulosi fitoren e suharekasve me rezultat 3-0.

Pas këtij triumfi Ballkani është i dyti me tetë pikë, kurse për Drenicën kjo është disfata e parë në elitë dhe ndodhet në pozitën e shtatë me katër pikë.

Kujtojmë se drenicakët kanë një ndeshje më pak, pasi nuk kanë luajtur me Dritën, për shkak të angazhimeve në Evropë të skuadrës nga Gjilani.

Sfidën e radhës Ballkani e luan me Llapin, kurse Drenica takohet me Dukagjinin./Arbresh.info