Kristjan Asllani po përgatitet për një ndeshje shumë të veçantë siç është finalja e Ligës së Kampioneve ndaj PSG.

Mesfushori shqiptar, shpreson që këtë herë të jetë protagonist edhe në fushën e lojës, e jo vetëm në bankën rezervë siç ndodhi dy vite më parë kur Interi u mund nga Manchester City.

Megjithatë, ai është i kënaqur edhe për mundësinë që i jepet, pasi siç u shpreh vetë Asllani për “Inter TV”, kjo është një mundësi që nuk e ka kushdo që të jetë në një finale të tillë.

“Padyshim e ndjej se jam rritur në këtë sezon, duke qëndruar pranë kampionëve rritesh edhe jashtë fushe. Tani duhet të përgatitim sa më mirë finalen e Ligës së Kampioneve, pasi i njohim shumë mirë vlerat e kësaj ndeshje”, tha fillimisht ai.

“Të ndodh të mendosh për finalen edhe kur je në shtëpi me familjen, jo të gjithë e kanë mundësinë të jenë aty për një ngjarje të veçantë. Duam ta sjellim në shtëpi trofeun”, vijoi Asllani.

Në fund, një koment edhe për Hakan Çalhanollun, me të cilin e ndan pozitën e njëjtë në fushë.

“Nga ai kam mësuar shumë, është një rol i komplikuar dhe ai është që tani një mjeshtër. Jam i lumtur që e kisha përkrah dhe që kam kaluar këto vite me të”, tha Asllani./Arbresh.info