Rusia mund t’i humbasë shumë ngjarje sportive, të cilat i ka organizuar deri tash.

Pas sulmit ushtarak ndaj Ukrainës, rusët mund të pësojnë në shumë aspekte, e në këtë rast edhe në sport.

Nesër pritet që UEFA t’ia heq të drejtën e organizimit të finales së Ligës së Kampionëve qytetit St. Petersburg.

E në ndërkohë, rusët mund të pësojnë edhe në sporte të tjera, shkruan “Gazeta Express”.

Në fakt, Formula 1 po e vëzhgon me kujdes situatën e krijuar në Ukrainë, pas sulmeve nga toka dhe ajrore që i ndërmori sot Rusia.

Në muajin shtator është paraparë të zhvillohet gara e këtij sporti “Russian Grand Prix”.

Gara e madhe e Formula 1 është paraparë të mbahet në qytetin olimpik, Sochi, 12 orë udhëtim në vozitje nga kufiri në mes të Ukrainës dhe Rusisë, ku trupat ruse e kanë nisur grumbullimin.

Por, pas nisjes së luftës, ekziston mundësia që kjo garë të mos mbahet fare, njoftojnë mediat ndërkombëtare.

Formula 1 siguron se do të vazhdojë ta monitorojë situatën nga afër.

Pak orë më parë, ngasësi gjerman, Sebastian Vettel tha se nuk do të marrë pjesë në garën që do të organizohet në Rusi.