Manchester City i drejtuar nga Pep Guardiola renditet i dyti në Premier League për sezonin 2025-26, pesë pikë pas liderit Arsenal të trajnerit Mikel Arteta, që ka një ndeshje më shumë të zhvilluar.

Këtë të mërkurë, City pret në “Etihad” skuadrën e Nottingham Forest, ndërsa Arsenali udhëton për t’u përballur me Brighton & Hove Albion.

Në konferencën për shtyp, Guardiola foli për gjendjen e yllit norvegjez Erling Haaland, i cili mungoi fundjavën ndaj Leeds për shkak dëmtimi.

“Haaland është shumë më mirë, por të hënën nuk u stërvitëm dhe do të vendosim sot”, deklaroi Pep, duke sqaruar se sulmuesi pësoi një goditje në stërvitjen e së enjtes së kaluar dhe nuk bëhet fjalë për problem në gju.

Guardiola u pyet edhe për rëndësinë gjithnjë e më të madhe të golave nga goditjet standarde në Premier League. Arsenali barazoi të dielën rekordin e golave të shënuar nga situata të tilla brenda një sezoni (16).

Trajneri i Cityt pranoi se “goditjet standarde janë pjesë e lojës” dhe se të gjitha ekipet duhet të përshtaten. Ai tha se në disa aspekte pajtohet me deklaratat e trajnerit të Liverpool, Arne Slot, i cili kishte theksuar se kjo prirje po e bën kampionatin “më pak të këndshëm për t’u parë”.

“Si trajnerë duhet të përshtatemi me futbollin nga ndërprerjet”, shtoi Guardiola./Arbresh.info