Një kompleks rrezikohej nga riaktivizimi i një vatre zjarri, por me ndërhyrjen e 60 forcave zjarrfikëse u bë i mundur lokalizimi i flakëve.

Ndërhyrjet vazhdojnë më shumë nga ajri sesa nga toka. Era në Shëngjin ndryshon shpesh drejtim duke favorizuar përhapjen e flakëve në të gjitha anët.

Dy vatra zjarri shpërthyen një ditë më parë në zonën e Shëngjinit duke djegur sipërfaqe të mëdha toke. Deri tani nuk raportohen dëme në njerëz ose bazë materiale.

Policia e Lezhës pasditen e së enjtes arrestoi edhe autorin e zjarrvënës Preng Përgjoni, 63  vjeç  banues në Lezhë, i cili kishte vënë qëllimisht zjarrin për ripërtëritjen e kullotave.

Ndërkohë, një vatër e madhe  zjarri  ka përfshirë një zonë mes Velipojës dhe Torovicës  në vendin e quajtur Mali Kolaj. Për pasojë me dhjetëra hektarë pyje e shkurre janë shkrumbuar nga flakë.

Zjarri ka nisur pak pas mesante dhe ende vazhdon të ketë zona të përfshira nga flakët. Aktualisht vatra e zjarrit është mjaft  larg zonave te banuara dhe ndërhyrja e zjarrfikëseve është e pamundur për shkak të terrenit të thellë malor.

Flakët janë duke u përhapur ne drejtim të Majës së Zezë  në zonën e Rrjollit të favorizuara dhe nga era. Për fat të mirë gjatë orëve të mesditës ritmi i përhapjes së flakëve ka rënë .

Dyshohet që zjarri të jetë vënë qëllimisht për hapjen e kullotave të reja./ Top Channel