Situata nga zjarret në vend është dinamike, kjo për shkak të erës së fortë dhe temperaturave shumë të larta.

Kështu bën me dije Ministri i Mbrojtjes Pirro Vengu, i cili thekson se flotës në veprim do t’u bashkohen edhe dy helikopterë të Forcës Ajrore të Emirateve të Bashkuara Arabe, 1 Canadair nga Greqia dhe dy helikopterë të mekanizmit evropian nga Çekia dhe Sllovakia të cilët do dislokohen që sonte në Rinas dhe Bazën Ajrore të Kuçovës.

Në një postim në rrjetet sociale, Vengu shkruan se deri më tani është bërë e mundur që të shmanget rreziku për zonat e banuara dhe se po punohet për të krijuar perimetër sigurie në të gjitha vatrat problematike.

“Vëmendje dhe angazhim maksimal në terren nga Forcat e Armatosura, Forcat zjarrfikëse dhe ato të Policisë për të siguruar zonat e banuara përreth të cilave po punojmë për të krijuar perimetër sigurie në të gjitha vatrat problematike. Që nga mëngjesi i sotëm janë evidentuar 21 vatra zjarri në vend, prej të cilave 7 janë shuar dhe 14 vijojnë aktive. Avioni Canadair kroat ka operuar aty ku nevoja ka qenë më e madhe, në Krane të Finiqit dhe Lukovë të Himarës, ndërsa ekuipazhet e Bazës Ajrore Farkë kanë ndërhyrë në Ballaj dhe Zhabjak të Rrogozhinës dhe aktualisht në Poliçan, ku flakët nuk rrezikojnë perimetrin e ish-Kombinatit Mekanik. Misionet nga ajri dhe ndërhyrja nga toka në këto zona kanë ulur rrezikun për banorët, shtëpitë dhe bizneset, por situata vazhdon të mbetet dinamike si pasojë e erërave të forta dhe temperaturave të larta që do të vazhdojnë të dominojnë në vend”, shkruan ministri.

Ai bën me dije se Komiteti Shtetëror i Emergjencave Civile ka urdhëruar rritjen e gatishmërisë së Bashkive në nivelin maksimal në mbarë vendin./rtsh.al/