Vrasja e një gruaje duke e hedhur nga dritarja e pallatit pesë katësh në Fier është shoqëruar me komente nga klasa politike e vendit.

Deputetja demokrate Majlinda Bregu pyeti publikisht se si kishte muundësi që një grua, e cila kishtë urdhër mbrojtje jetonte ende me dhunuesin e saj. Në lidhje me këtë reagoi pak më vonë edhe ministri i Drejtësisë, Ylli Manjani i cili tha se ka nisur një hetim për të gjetur fajtorët e mos zbatimit të këtij urdhri mbrojtjeje që çuan në vdekjen e Liliana Rukos.

Statusi i Manjanit

Deputetja dhe Kryetarja e Komisionit Parlamentar të Integrimit, Zonja Majlinda Bregu ka ngritur një shqetësim në lidhje me ngjarjen e rëndë të Fierit.

Ndaj të njëjtat shqetësime me zonjën Bregu. Ngjarja është tepër e rëndë aq sa i tejkalon kufinjtë e njerëzores! “Burrë-shtaza” që e ka kryer këtë krim meriton pa dyshim një ndëshkim mbi-njerëzor!
Në këtë moment nuk di shumë detaje për çështjen e lëshimit të urdhërit të ekzekutimit, por, pas një interesimi on-line të personelit të Ministrisë, del se gjykata e Fierit ka pranuar edhe provizorisht edhe përfundimisht kërkesën për mbrojtje të zonjës së ndjerë tashmë.

Do të doja të kisha një informacion shterrues për pyetjet e zonjës Bregu, por në këtë moment pyetjet që ajo ngre janë edhe të miat.

Pra pyetjet: “Përse megjithë urdhërin e mbrotjes e ndjera jetonte përsëri me burrin agresor?! Kush ka gabuar: gjykata që ka lëshuar urdhërin apo zbatuesit e atij Urdhëri?!

Megjithë statusin ende të paqartë ligjor në këtë situatë post-reformë ( askush nuk e di tashmë nëse duhen zbatuar ligjet e reja që kanë hyrë në fuqi por nuk zbatohen dot, apo do vazhdohet me ligjet e vjetra!!), do të çel nesër një proces hetimor administrativ, për të sqaruar këto pyetje. Në çdo rast ky hetim do sqarojë edhe përgjegjësitë përkatëse.

Ekziston gjithashtu një rrugë tjetër më e shpejtë, hetimi penal i cili besoj ka nisur tashmë.

Prandaj i kërkoj që sot Prokurorisë së Fierit të përfshijë në hetim edhe procesin e lëshimit të Udhërave të Mbrotjes. Prokuroria ka mundësinë ligjore të sqarimit dhe të veprimit të shpejtë mbi çdo person përgjegjës!
Sidoqoftë, Hetimi ynë Administrativ do fillojë nesër!
Duhet mbyllur njëherë e mirë shtegu i “shtazëve” që dhunojnë familjet e tyre! S’Ka e s’mund të ketë mbrojtje për shtazët! Mbrotja është paraparë për njerëzit!
Me këtë rast shpreh ngushëllimet e mia më të sinqerta për humbjen e jetës së një gruaje, nënë e dy fëmijëve!