Policia e Lezhës ka arrestuar një 31-vjeçar, pasi qëlloi me armë zjarri në ajër. Gjithashtu sekuestroi edhe armën tip automatik.

Një ditë më parë, policia ka marrë njoftim se në Malin e Rrencit në Shëngjin – Lezhë , ka të shtëna me armë zjarri. Si pasojë, në vendngjarje kanë mbërritur efektivët e Seksionit për hetimin e krimeve në Komisariatin e Policisë Lezhë, ku falë veprimeve të shpejta hetimore , bënë të mundur arrestimin në flagrancë të shtetasit Erbardh Gjeloshi, 31 vjeç, banues në Gocaj.

Veprat penale në ngarkim të tij janë “Prodhim dhe mbajtje pa leje e armëve luftarake dhe municionit” dhe “Prishje e rendit dhe qetësisë publike” parashikuar nga nenet 278/2 dhe 274 të Kodit Penal.

Gjithashtu u procedua penalisht në gjendje të lirë edhe shtetasi A.U. 36 vjeç, banues në Shëngjin – Lezhë , për veprën penale “Moskallzim krimi ” parashikuar nga neni 300 i Kodit Penal.

Në cilësinë e provës materiale u gjet dhe sekuestrua arma e zjarrit automatik si dhe një gëzhojë. Materialet procedurale i kaluan Prokurorisë së Rrethit Gjyqësor Lezhë për veprime të mëtejshme.