Struktura e Posaçme Kundër Korrupsionit dhe Krimit të Organizuar (SPAK) ka publikuar bilancin e punës për periudhën 1 janar-15 korrik 2026, duke bërë të ditur se hetimet financiare dhe gjurmimi i pasurive të dyshuara si produkte të veprimtarisë kriminale kanë qenë në fokus të punës së saj.

Sipas të dhënave të publikuara nga SPAK, gjatë kësaj periudhe, në pesë procedime penale të rëndësishme, gjykata ka vendosur masa sekuestroje preventive mbi pasuri me vlerë rreth 440 milionë euro.

Pasuritë e sekuestruara përfshijnë një gamë të gjerë asetesh, mes të cilave:

-prona të paluajtshme, përfshirë tokë, truall dhe sipërfaqe pyjore me mbi 150 mijë metra katrorë;

-më shumë se 60 vila, apartamente dhe hotele;

-mbi 10 shoqëri tregtare, kuota kapitali dhe asetet e tyre;

-mbi 620 llogari bankare;

-rreth 100 automjete dhe mjete lundruese.

SPAK ka bërë gjithashtu një krahasim me vitet e mëparshme, duke theksuar se gjatë periudhës 2020-2025, vlera totale e pasurive të sekuestruara ka qenë rreth 220 milionë euro.

Sipas institucionit, rritja e ndjeshme e vlerës së pasurive të sekuestruara lidhet me intensifikimin e hetimeve financiare, analizën e burimeve të pasurisë dhe ndjekjen e aseteve që dyshohet se kanë lidhje me veprimtari kriminale.

Gjatë shtatë muajve të parë të 2026, SPAK thotë se janë dënuar me vendim të formës së prerë gjithsej 7 ish-zyrtarë të lartë, mes tyre:

-2 ish-kryetarë bashkish;

-1 ish-ministër;

-2 ish-deputetë;

-2 ish-prokurorë.

SPAK thekson se ndjekja penale ndaj zyrtarëve të lartë dhe ish-funksionarëve publikë ka qenë një ndër prioritetet kryesore të punës së saj, në kuadër të luftës kundër korrupsionit dhe krimit të organizuar.

Të dhënat janë pjesë e raportimit periodik të SPAK mbi aktivitetin e institucionit dhe rezultatet e punës së prokurorëve të posaçëm gjatë vitit 2026.

Kreu i SPAK për rastin e Ermal Beqirit: Kemi kërkuar sekuestrimin e pasurive të tij

Pas prezantimit të të dhënave, kreu i SPAK, Klodian Braho komentoi edhe mbi çështje të tjera, duke iu përgjigjur interesit të medias.

Ai u ndal konkretisht te rasti i Ermal Beqirit, i cili u arrestua dy ditë më parë në Francë, i akuzuar si pjesë e dosjes së tenderëve të AKSHI-t.

Sipas Brahos, SPAK ka pasur informacion mbi vendndodhjen e Beqirit dhe se kishin nisur letërporosinë pranë autoriteteve franceze.

Ai theksoi se SPAK ka kërkuar më herët sekuestrimin e pasurive të tij, ndërsa tha se Beqiri nuk disponon vetëm avionë, por dhe pasuri të tjera.

“Ne kishim informacion, e kishim lokalizuar dhe kishim nisur letërporosinë drejt Francës për disa veprime hetimore për të cilën do të keni shumë shpejt edhe njoftim zyrtar.

Ne kishim kërkuar me herët nga Franca sekuestrimin e pasurive të Ermal Beqirit. Nuk ka vetëm avionë atje ka edhe pasuri të tjera”, theksoi kreu i SPAK.

Shehaj “vodhi” marrëveshjen konfidenciale me SHBA, Braho: Ka një kallëzim për të, po verifikojmë pretendimet

Më tej, Braho u pyet mbi kallëzim penal për kreun e partisë “Mundësia”, Agron Shehaj, pasi ky i fundit e mori nga Kuvendi marrëveshjen sekrete të huasë 302 milionë dollarë mes Shqipërisë dhe Shteteve të Bashkuara të Amerikës dhe iku me vrap korridoreve të Kuvendit.

Ai konfirmoi se ka një kallëzim penal për Shehaj në SPAK, ndërsa theksoi se institucioni po kryen verifikimet e duhura.

“Ka një kallëzim penal që ka mbërritur është më proces verifikimi. Prokurori po verifikon pretendime dhe do dalë me një vendim“, tha ai./tvklan.al