Klajdi Mustaj, punonjës i Policisë Rrugore në Fier, është nderuar me “Certifikatën për Shërbime të Dalluara” nga drejtori i Përgjithshëm i Policisë së Shtetit, Ilir Proda, për veprimin e tij të guximshëm në shpëtimin e tre qytetarëve të lënduar gjatë një aksidenti në aksin rrugor Levan–Fier.

Sipas njoftimit zyrtar, Mustaj reagoi me shpejtësi dhe profesionalizëm për të ndihmuar të lënduarit, duke u bërë shembull i misionit të Policisë së Shtetit për t’u gjendur pranë qytetarëve në momentet më kritike.

“Veprimi i policit Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë i punonjësit tonë është shembull frymëzues për të gjithë trupën policore”, tha drejtori Ilir Proda, duke i shprehur mirënjohje për guximin dhe humanizmin e treguar.

Mustaj është pjesë e Policisë së Shtetit që nga shkurt 2024, pas përfundimit të Kolegjit Profesional për Patrullë të Përgjithshme.