Ministria e Energjisë dhe Infrastrukturës ka nisur këtë të hënë procedurat për zgjidhjen e njëanshme të kontratës koncensionare për ndërtimin e një sërë HEC-esh në lumin Osum.

Vendimi vjen disa ditë pas publikimit në media të një skandali të përmasave të mëdha, ku qeveria “pa dashje” kishte lejuar hapjen e dritësh jeshile për ndërtimin e HEC-eve në lumin Osum.

“Ministria e Infrastrukturës dhe Energjisë njofton se ka administruar vendimin Nr.01, datë 15.02.2018 të Ministrisë së Turizmit dhe Mjedisit, e cila ka njoftuar pavlefshmërinë absolute të aktit administrativ “Vendimi për VNM paraprake, Nr.13, Nr.137 identifikimi, datë 26.03.2015” për aktivitetin instalime për prodhimin e energjisë hidroelektrike për hidrocentralet Bigas 1 dhe Bigas 2”, në pellgun ujëmbledhës “Përroi i Bigasit”, Skrapar””, thuhet në njoftimin e ministrisë.

Pas plasjes së skandalit, qeveria e të majtëve reagoi disa ditë më tutje, duke u justifikuar se e gjitha ishte një gabim njerëzor. Kryeministri edi Rama do ta sqaronte kështu “keqkuptimin”.

Postimi i plotë i Kryeministrit Rama

“Qysh se u krye procedura ligjore e miratimit të një lejeje të dhënë nga qeveria e mëparshme dhe u mor sinjali se diçka nuk shkonte, Ministri i Mjedisit Blendi Klosi nisi hetimin administrativ të lejes mjedisore. E cila rezultoi një fabrikim kriminal me koordinata të manipuluara. Individët e përfshirë në këtë fabrikim do të kallëzohen në prokurori, ndërsa e gjithë procedura do të anulohet.

Falenderoj qytetarët që na e çuan të parët këtë sinjal përmes Platformës së Bashkëqeverisjes shqiperiaqeduam.al dhe të gjithë të tjerët që u përfshinë në publikimin e këtij krimi të mbetur në tentativë.

Asnjë qeveri askund në botë nuk është e pagabueshme, por qeveritë dallojnë nga mënyra sesi reagojnë, qoftë kur gabojnë apo qoftë si në këtë rast, kur pa dashje mund të jenë duke gabuar.

Ndjesë kujtdo që me të drejtë u shqetësua apo pikëllua nga lajmi i keq i prekjes së Kanioneve Magjike dhe mezi pres të rikthehem atje, në duart e djemve e vajzave të mrekullueshme të Federatës Shqiptare të Raftingut”, mbyllet postimi i Kryeministrit në “Facebook”.