Në një aktivitet të zhvilluar në Gjirokastër, “Dita e hapur” e Forcave të Armatosura, Ministri i Mbrojtjes, Pirro Vengu, u ndal te rëndësia që kanë Forcat e Armatosura për rininë shqiptare.

Sipas tij, institucioni ofron një karrierë të qëndrueshme dhe me vlera qytetare, një profesion me të cilin i shërben vendit, formohesh si qytetar dhe si profesionist.

“Karriera në Forcat e Armatosura është një karrierë e qëndrueshme, me një larmi profesionesh dhe mundësi për specializime në shkollat me prestigjioze të planetit. Vitet e fundit, qeveria shqiptare ka ndërmarrë një sërë investimesh, edhe për trajtimin financiar, duke e renditur Forcën e Armatosur në forcën më të mirëpaguar në rajon,” deklaroi ministri Vengu.

Në aktivitet morën pjesë edhe të rinj të interesuar për t’u bërë pjesë e Forcave të Armatosura, të cilët panë nga afër prezantimin e pajisjeve ushtarake dhe patën mundësinë të informohen mbi kriteret e pranimit.

“M’u duk shumë interesant. Ka oportunitete të mëdha, pse jo, për ata që e kanë pasion këtë gjë,” u shpreh një i ri i interesuar.

Përmes këtyre aktiviteteve promovuese, Ministria e Mbrojtjes synon të afrojë të rinjtë drejt një strukture që nuk ofron vetëm stabilitet, por edhe ndjenjën e përkatësisë dhe të shërbimit ndaj vendit./rtsh