Në bregdetet shqiptare, ka nisur operacioni policorë “Plazh i lirë”, që ka për qëllim lirimin e hapësirave publike në plazh.

Policia e Shtetit njofton se operacioni ka nisur nga Dhërmiu dhe gjatë ditës së parë të këtij operacioni, u konstatuan tre raste të pushtimit të hapësirave publike për t’i shfrytëzuar me qëllim fitimin, përcjell Arbresh.info.

Gjatë operacionit u sekuestruan 37 çadra dhe 68 shezlongë.

“Në vijim të veprimeve procedurale për këto raste, specialistët për Hetimin e Krimeve të Komisariatit të Policisë Himarë referuan materialet në Prokurori ku nisi procedimi në gjendje të lirë për shtetasit:

-R. I., banues në Tiranë, pasi kishte vendosur pa autorizimin përkatës, 15 çadra dhe 30 shezlongë;

-L. C., banuese ne Tirane, pasi kishte vendosur pa autorizimin përkatës, 12 çadra dhe 24 shezlongë;

-E. A., banues në Tiranë, pasi kishte vendosur pa autorizimin përkatës, 10 çadra dhe 14 shezlongë”, thuhet në njoftimin e Policisë së Shqipërisë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme, për veprat penale “Pushtimi i tokës”, “Mospagimi i taksave dhe i tatimeve” dhe “Ushtrimi i aktivitetit tregtar i paregjistruar”.

Operacioni “Plazh i lirë” vijon./Arbresh.info/