Policia e Shtetit, në bashkëpunim me Interpol Tiranën dhe autoritetet e Emirateve të Bashkuara Arabe, është në fazat përfundimtare të ekstradimit të një anëtari me rrezikshmëri të lartë të grupit kriminal “Bajri” të Shkodrës.

I kërkuari, i cili mbahej në paraburgim në Dubai, pritet të sillet në Shqipëri brenda ditës së sotme, në kuadër të operacionit policor ndërkombëtar të koduar “The Wanted”.

Ai është i akuzuar për disa vepra penale të rënda, përfshirë “Vrasje me paramendim” në kuadër të grupit të strukturuar kriminal, “Prodhim dhe mbajtje pa leje e armëve luftarake dhe municioneve”, si edhe “Sigurimi i kushteve për të kryer vrasje”.

Gjykata e Posaçme e ka caktuar më herët masën e sigurisë “arrest me burg”, ndërsa ekstradimi i tij shihet si një zhvillim i rëndësishëm në luftën kundër grupeve të organizuara kriminale.

Njoftimi:

Policia e Shtetit/Vijon operacioni policor ndërkombëtar i koduar “The Wanted”, për kapjen dhe ekstradimin e shtetasve të shpallur në kërkim ndërkombëtar.

Si rezultat i bashkëpunimit shumë të ngushtë të Interpol Tiranës me Interpol Abu Dhabi dhe me partnerët në Emiratet e Bashkuara Arabe, në kuadër të operacionit policor ndërkombëtar të koduar “The Wanted”, pritet që gjatë ditës së sotme të finalizohen procedurat për ekstradimin nga Dubai, Emiratet e Bashkuara Arabe, në Shqipëri, të shtetasit shqiptar Denis Brajoviq, 37 vjeç, shtetas i shpallur në kërkim ndërkombëtar, me rrezikshmëri shumë të lartë shoqërore, i akuzuar për një sërë veprash penale në fushën e krimeve kundër personit, të kryera në formën e grupit të strukturuar kriminal dhe për armëmbajtje pa leje.

Ky shtetas ishte i shpallur në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar Tiranë i ka caktuar masën e sigurisë “Arrest në burg”, për veprat penale: “Vrasja me paramendim”, kryer në formë të veçantë të bashkëpunimit, atë të grupit të strukturuar kriminal; “Prodhimi dhe mbajtja pa leje e armëve luftarake dhe municioneve”; “Grupi i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”; dhe “Sigurimi i kushteve dhe i mjeteve materiale për të kryer vrasje”, kryer në formën e veçantë të bashkëpunimit, atë të grupit të strukturuar kriminal.

Në lidhje me orën e mbërritjes, do të ketë një njoftim tjetër.