Në Shqipëri, një sipërmarrës dhe 8 kontrollorë të policisë kufitare në aeroportin ndërkombëtar të Rinasit janë vënë nën akuzë pasi prokuroria zbuloi një skemë për të favorizuar daljen nga vendi të personave të cilëve u është ndaluar udhëtimi për në vendet e Bashkimit europian. Enea Sulejmani, pronar i një agjencie udhëtimesh dhe inspektori Briken Tereziu, u arrestuan, i pari për “Korrupsion akti të zyrtarëve”, ndërsa i dyti për “korrupsion pasiv” dhe “Shpërdorim detyre”. Për 7 kontrollorët e tjerë, u dha masat e “arrestit në shtëpi” dhe “detyrim paraqitje”, ndërsa akuzohen për shpërdorim detyre.

Skema e vënë në jetë, u zbulua pas zbërthimit të telefonit të Sulejmanit, i cili ishte arrestuar fillimisht për trafik të lëndëve narkotike. Sulejmani, sipas Prokurorisë, mbante kontakte të vazhdueshme me punonjësin e policisë Tereziu, të cilit i dërgonte të dhënat e personave të cilët kishin blerë bileta në agjensinë e tij, për verifikim paraprak të rekordeve në sistemin TIMS, për të parë nëse plotësonin kushtet për të udhëtuar drejt vendeve të BE-së. Inspektori i policisë e informonte rast pas rasti për problematikat e çdo udhëtari.

Hetimi ka zbuluar se më pas “jepeshin udhëzimet mbi kabinën ku duhet të paraqiten për përpunimin e të dhënave dhe vlerat monetare në këmbëim të lejimit për të udhëtuar dhe formën e dorëzimit të tyre”.

Sipas prokurorisë, pagesat përcaktoheshin në varësi të problemit që një udhëtar kishte, një pjesë e të cilëve nuk kishin asnjë lloj pengese, por mashtroheshin duke u detyruar të paguanin 50 euro. Ndërsa pagesat shkonin në 500 euro apo më shumë për ata që kishin problematika që lidheshin me ndalimin e hyrjes në vendet e Bashkimit europian sepse ishin dëbuar nga autoritetet vendase./VOA