Bashkimi Europian dhe Shqipëria nënshkruan një marrëveshje të premten e kaluar për të forcuar koordinimin gjyqësor në luftën kundër krimit të organizuar. Vendi ynë bëhet i treti në Ballkan, pas Maqedonisë dhe Malit të Zi që e nënshkruan këtë marrëveshje. Për palën shqiptare firmosi ministrja e Drejtësisë, Etilda Gjonaj, ndërsa nga EuroJust, Njësia e Bashkëpunimit Gjyqësor të BE, ishte presidenti Ladislav Hamran.

Në shkrimin e publikuar në faqen e  OCCRP, platforma investigative për krimin dhe korrupsionin, përmendet ndër të tjera edhe fuqizimi i grupeve kriminale në Shqipëri dhe mbështetja që ato gjejnë tek politika. Ilustrim për këtë thotë raporti, është rasti i ish-ministrit të Brendshëm, Saimir Tahiri.

Më tej përmendet sasia madhe prej 613 kg kokaine që u kap në Durrës, protestat kundër qeverisë dhe shkrimi i Ramës në “Financial Times”, ku kryeministri tregon përpjekjet në luftën kundër drogës./lapsi.al/