Dy persona në Fier kanosnin me jetë dhe i marrin 31 mijë euro një tjetri.

Mbrëmjen e djeshme, e enjte, u kurorëzua operacioni i koduar “Dermenasi” gjatë të cilit u arrestuan Nezir Bullaku, 48 vjeç, i dënuar më parë për vrasje në tentativë dhe Afrim Berisha, banues në Dërmenas, Fier.

Arrestimi i dy tyre u bë, pasi kanë shtrënguar nëpërmjet kanosjes me jetë, për t’i marrë një pasuri në shumën 50 mijë euro shtetasit E.R.

Në periudha të ndryshme kohore në bashkëpunim me njëri-tjetrin, ata i kanë marrë duke e kanosur deri në shumën prej 31.500 euro.

Në momentin e arrestimit, në ambientet e një lokali, Bullakut dhe Berishës, i’u sekuestrua një shumë prej 3000 eurosh, të cilën sapo ia kishin marrë duke e kanosur të dëmtuarin.

Në cilësinë e provës materiale u sekuestruan shuma prej 3000 eurosh, disa aparate celular të përdorur nga të dyshuarit dhe një karikator arme zjarri pistoletë.

Lidhur me këtë ngjarje vijojnë ende hetimet, ndërkohë që materialet i kaluan Prokurorisë për Krimet Rënda Tiranë për veprat penale “Shtrëngim me anë të kanosjes ose dhunës për dhënie pasurie” dhe “Mbajtje pa leje të armëve dhe municioneve luftarake”.