Data se kur do të lejohet frekuentimi i plazheve në Shqipëri

23:54 | 10 Maj 2020
Trina Galanxhi

Qeveria ka një plan të hap plazhet, duke shpresuar që të shpëtojë edhe sezonin turistik, mbi të cilin varet edhe ekonomia shqiptare. Ulja e shifrave të të prekurve ka bërë optimist institucionet shtetërore për nisjen e sezonit turistik.

Në fund të majit pritet hapja e plazhit për të gjithë pushuesit. Në një prononcim për Tv Klan, drejtoresha e Agjencisë Kombëtare të Turizmit, Kornelia Ferizaj, thotë se në bashkëpunim me strukturat akomoduese edhe me subjektet e plazhit janë marrë masat për distancimin fizik.

Në plazhet ku çadrat do të jenë 3.5 metra larg njëra tjetrës do të jetë vrojtuesi i plazhit ai që do të merret me zbatueshmërinë e masave. Edhe në ujë pushuesit nuk do të lejohen më afër se 3.5 metra.

Në strukturat akomoduese, ushqimi nuk do të jetë me vetëshërbim, por çdo pushues do i serviret në dhomën e hotelit. Ndërsa koordinatori shëndetësor do të merret me matjen e temperaturës në mëngjes dhe darkë për turistët e hotelit.