Cakaj telefonatë me homologun e tij kanadez: Të angazhuar për të thelluar bashkëpunimin mes dy vendeve

19:21 | 5 Qershor 2020
Arbresh.info

Ministri në detyrë për Evropën dhe Punët e Jashtme, Gent Cakaj, zhvilloi një bisedë telefonike me Ministrin e Jashtëm të Kanadasë, François-Philippe Champagne.

Në një reagim në facebook, Cakaj bëri me dije se biseda u përqëndrua në punën e përbashkët në luftën kundër COVID-19, bashkëpunimin në fushën e shëndetësisë dhe nevojën e masave për rimëkëmbje ekonomike.

Gjithashtu, dy homologët u ndalën edhe në bashkëpunimin në kuadër të NATO-s, OSBE-së dhe mbështetjen e ndërsjellë në institucione të ndryshme ndërkombëtare.

“Vlerësuam shumë pozitivisht bashkëpunimin dypalësh dhe konfirmuam vullnetin për të thelluar marrëdhënien tonë edhe më tutje, nëpërmjet projekteve konkrete.” – përfundoi Cakaj reagimin e tij.