Disa zona të veriut të Shqipërisë janë përfshirë nga dëbora.

Në bashkitë e Kukës dhe Hasit ka prezencë dëbore me intensitet mesatar, ndërsa bashkia e Tropojës është përfshirë nga vranësira.

Të gjitha akset rrugore nacionale janë të qarkullueshme normalisht.

Nga subjektet kontraktore është punuar për pastrimin dhe kriposjen e rrugëve dhe mbajtjen e tyre funksionale.

Gjithashtu nga bashkitë Kukës, Tropojë dhe Has nuk ka raportime për ndonjë problematikë emergjente.

I gjithë qarku i Kukësit furnizohet me energji elektrike, ndërsa në Shkodër në aksin rrugor Qafë Mali–Fierzë në orët e para të mëngjesit kanë filluar reshjet e para të dëborës, por pa shkaktuar probleme në qarkullim.

Policia apelon që qarkullimi i automjeteve në zonat malore duhet të kryhet me goma dimërore.

Në Bashkinë e Pukës, reshjet e dëborës janë me intensitet të ulët, ndërsa në bashkinë e Fushë-Arrëzit, reshjet e dëborës kanë arritur deri në 8 cm. Nuk raportohen probleme nga kjo bashki. Rrugët janë të hapura dhe qarkullimi i automjeteve vijon pa probleme.

Në Mirditë, reshjet e dëborës kanë krijuar problematika në Rrugën e Kombit, ndërsa në segmentin Reps–Thirre janë regjistruar tri aksidente.

/rtsh.al/