Bashkia e Tiranës, përmes një deklarate, ka reaguar për veprimet e protestuesve në Tiranë sot, pranë Parkut të Lodrave të Fëmijëve, duke thënë se “Aspiratat e qytetit nuk mund të pengohen nga vandalët e zhurmshëm”.

Veprimet e protestuesve, Bashkia e Tiranës i ka quajtur veprime vandalësh të udhëhequr nga eksponentë të Partisë Demokratike.

“Sot, një grup i vogël njerëzish, me veprime vandalësh, u përfshinë në dëmtime masive të pronës publike, të pronës së përbashkët te të gjithë qytetarëve të Tiranës, duke sulmuar e prishur objekte për të penguar sërish punimet për Parkun e Lodrave të Fëmijëve. Të udhëhequr nga eksponentë të Partisë Demokratike, për të disatën herë kanë dëmtuar pronën e qytetit, duke krijuar dëme materiale dhe vonuar punimet për të ofruar një shërbim të munguar, që është një ëndërr e fëmijëve të qytetit, por edhe e prindërve, gjysheve, gjyshërve tanë. Një minorancë e zhurmshme po i kundërvihet aspiratave të shumicës së qytetarëve që e duan zhvillimin e qytetit. Janë të njëjtit njerëz që për 4 vjet e lanë qytetin të dergjet në plehra, rrugë e trotuarë të degradojnë, ndriçimin e qytetit dhe të vetë parkut të shuhet, që lanë lokalet të mbijnë si kërpudha në të gjithë hapësirën e parkut, ata që deri dje e hëngrën parkun e Tiranës nga të gjitha anët, që nuk mbollën asnjë pemë e që s’lanë pemë pa hedhur përtokë, që hapën gropa për pallate shumëkatëshe, të cilat ende i qajnë që ju mbetën veç gropë, sot veshin petkun e dashnorëve të pemëve dhe që sot, duke servirur informacione të pavërteta, duke trumpetuar tmerre të paqena, duan me çdo kusht që Parku i Lodrave për Fëmijët të mos mbarojë”, thuhet në deklaratën e Bashkisë së Tiranës.

Sipas Bashkisë së Tiranës, ata që protestuan sot nuk e duan zhvillimin e vendit dhe se çdo sukses i Bashkisë së Tiranës është provë e dështimit të Lulzim Bashës.

Në deklaratë thuhet se mirëmbajtja e tanishme e qytetit të Tiranës tregon se Basha ka dështuar.

“Kjo është arsyeja e vërtet ë përse i janë turrur parkut të lojërave. Bashkia e Tiranës mbetet e vendosur për të vijuar për t’i shërbyer çdo ditë qytetarëve dhe për të sjellë projekte që përmirësojnë cilësinë e jetës së qytetarëve të Tiranës. Aspiratat e qytetit nuk mund të pengohen nga vandalët e zhurmshëm” thuhet në deklaratë.

Sot në tiranë, Shoqëria civile protestoi ndaj projektit të Bashkisë së Tiranës tek zona e Liqenit Artificial, ku pritet të ndërtohet një park për fëmijë.

Gjatë protestës, protestuesit tentuan të prishin gardhin rrethues tek vendi ku është planifikuar ndërtimi i parkut të fëmijëve.

Të pranishëm ishin edhe pjestarë të forcave të rendit të cilat edhe shoqëruan për në stacion disa protestues.