Plot 9 vite kanë kaluar nga koha kur Michael Jackson u nda nga jeta, ndërsa në Londër, ylli i “Pop”-it është përkujtuar përmes një ekspozite të veçantë.

Në të, Jackson përshkruhet si shpëtimtar, shenjt, sipërmarrës, ikonë, monark, i maskuar dhe misterioz.

Galeria Kombëtare e Arteve në Londër qëndron hapur prej 25 qershorit, duke pritur mijëra vizitorë për të parë në një këndvështrim më bashkëkohor jetën e “Mbretit të Popit”.

Pjesë e ekspozitës është edhe portreti i fundit i Michael Jackson, përpara se të ndërronte jetë.

Edhe pse ka kaluar gati një dekadë nga vdekja e tij, albumet e tij sërish sigurojnë fitime marramendëse. Në gusht, këngëtari do të mbushte 60 vjeç, ndaj dhe 48 artistë të njohur, me kombësi të ndryshme, u bënë bashkë për të varur në mur punimet e tyre më të mira nga jeta e legjendës së muzikës në këtë përvjetor.

“Mbi mur” titullohet ekspozita, që pas Londrës do të vijojë turin në Paris, Bon dhe Finlandë. Kuratori i ekspozitës thotë se ky nuk është një koleksion në kujtim të tij, apo biografi e Jacksonit, por një retrospektivë e karrierës së tij në muzikë, kërcim dhe stil.