Kryeministri Zoran Zaev tha se tashmë në Maqedoni janë ndërruar 20 tabela ku shkruhej “okupatori fashist bulgar”.

Zaev në një intervistë për agjencinë bullgare “BGNES” thotë se gjatë luftës së Dytë Botërore bullgarët fillimisht kanë qenë vetëm administratorë, ndërsa më pas i janë bashkangjitur frontit anti-fashist dhe bashkërisht me maqedonasit kanë çliruar Kriva Pallankën, Shkupin dhe Kumanovën, transmeton Alsat.

“Ka pasur administratë në atë moment, në fillim. pastaj Bullgaria u ngrit së bashku me antifashizmin, luftoi për liri, demokraci, dhe pa diskutim është pjesë e frontit anti-fashit. Ushtritë maqedonase dhe bullgare së bashku kanë çliruar territore-Kriva Pallankën, të gjithë rajonin e Kumanovës, Shkupin. Kjo është një pjesë e bukur e historisë sonë”, deklaroi Zaev.

Kreu i ekzekutivit më tej thotë se politikanët e ish Jugosllavisë i kanë mbajtur të ndarë maqedonasit dhe bullgarët.

“Është detyrë e të gjithë qytetarëve, mbi të gjitha detyrë për neve, për politikanët që t’i afrojmë popujt tanë sa më afër, sepse ata janë mbajtur larg njëri-tjetrit për shumë vite. Qeveri të ndryshme, veçanërisht në kohën e ish-Jugosllavisë. Por ne duhet të jemi së bashku, sepse jemi fqinjë të parë. E dini, unë jam nga Strumica. Njerëzit nga Petriçani dhe Strumica flasin gati të njëjtën gjuhë”, tha Zaev.