Përveç dhimbjes që e kanë për humbjen e familjarëve të tyre, qytetarët detyrohen që të paguajnë edhe shuma të mëdha për varrosjen e atyre që ndërrojnë jetë nga Covid-19.

Pas reagimeve të shumta në opinion dhe nga qytetarët, Ndërmarrja Publike për Varrim ka sjellë vendim që ta ulë çmimin për varrosjen e personave që humbin jetën nga coronavirusi, përcjell Telegrafi Maqedoni.

Ministri i Shëndetësisë Venko Filipçe, sot deklaroi se ka biseduar me drejtorin e ndërmarrjes, ndërsa ai ka sjellë vendim për uljen e çmimeve.

“Kam biseduar me drejtorin e ‘AD Butel’, ai ju ka dalë në ndihmë dhe i ka ulur çmimet”, tha Filipçe.

Ndërsa i pyetur se pse Qeveria nuk i merr përsipër këto harxhime, ai tha se deri tani nuk është biseduar për këtë çështje.

“Nuk kemi biseduar në Qeveri për këtë çështje. Kam biseduar me drejtorin e ‘AD Butel’ dhe ai solli vendim për uljen e çmimeve”, tha Filipçe.

Për rastet me Covid-19, për të gjitha shërbimet e varrimit çmimet janë ulur prej 7 deri në 10 mijë denarë.