Arrestimi i Nicolás Maduro, në Serbi vazhdon të shfrytëzohet si pjesë e një narrative të përgjithshme anti-perëndimore.

Para ambasadës së Venecuelës në Beograd mbrëmë u mbajt një tubim mbështetës, i organizuar nga organizata komuniste, ku u dënuan veprimet e administratës Trump dhe u dërguan porosi kundër, siç e quajtën ata “imperializmit amerikan”.

Ky tubim shihet si vazhdim i diskursit dominues në institucionet dhe mediat proqeveritare, ku rasti i Madurros përdoret për të arsyetuar autoritarizmin e brendshëm dhe politikën e jashtme të balancimit.

Nga njohës të fushës, reagime të llojit të këtillë, konfirmojnë orientimin afatgjatë anti-perëndimor të Beogradit zyrtar.

“Qytetarët e Serbisë janë për dekada të tëra të ekspozuar ndaj një propagande të fortë anti-perëndimore. Në këtë kontekst, mbështetja për Madurron nuk më habit aspak, është një model i pranishëm prej dekadash, nga Sadam Huseini dhe Gadafi, deri te Putini”, ka thënë Zoran Vuletiq nga Forumi Demokratik Qytetar.

Ndonëse Beogradi zyrtar, arrestimin e Maduros nga Shtetet e Bashkuara e cilësoi si veprim politikisht të motivuar dhe shembull të “sundimit të forcës”, mediat proqeveritare serbe, përmes porpagandës të përkrahur nga Vuciqi, e paraqitën atë si viktimë të Perëndimit, duke e interpretuar ngjarjen si provë të standardeve të dyfishta.

Sipas Zoran Vuletiqit, pos që sjell mjegull në publik, kjo narativë, konfirmon mospërputhjen e vlerave midis Serbisë dhe Bashkimit Evropian.

“Serbia vazhdimisht tregon papajtueshmëri të thellë me Perëndimin. Nëse kjo qasje vazhdon, rruga jonë drejt Bashkimit Evropian do të mbetet e gjatë dhe e pasigurt “pothuajse e përhershme”, tha Vulletiq.

Serbia është harmonizuar pjesërisht me sanksionet e BE-së ndaj Venezuelës, por kurrë nuk e ka vënë në pikëpyetje legjitimitetin e Madurros. Pavarësisht se mbështeti deklaratën e BE-së që

konteston procesin zgjedhor të korrikut 2024, kryetarja e Kuvendit, Ana Brnabiq, mori pjesë në inaugurimin e Madurros në janar të vitit të kaluar.

Ndërkohë presidenti, Aleksandar Vuciq, e quajti Maduron një “mik të madh të Serbisë”, duke nënvizuar se në vend të përparimeve të mëdha të pritura nga administrata e Trumpit, kanë ardhur vendime që nuk janë në interes të Serbisë./rtk