Të mërkurën në Gjykatën Themelore të Podgoricës rinisi procesi gjyqësor ndaj 14 të akuzuarve për grusht shteti në Mal të Zi, ku pritej të dëshmonte dëshmitari i mbrojtur Sasha Singjeliq, shtetas serb dhe ish paramilitar në luftërat e ish Jugosllavisë dhe në frontin e Ukrainës përkrah forcave ruse.

Procesi nisi me vërejtje të avokatëve mbrojtës për parregullsi gjatë procesit gjyqësor duke kërkuar përjashtimin e gjykatëses së çështjes, Suzana Mugosha.

“Suzana Mugosha ka shkaktuar cenimin e të drejtave të të akuzuarve në mbrojtje për çka kërkohet përjashtimi i saj nga çështja” thanë avokatët.

Avokatët mbrojtës po ashtu kërkuan të “dhënat zyrtare për dy të akuzuarit rus Shishmakov dhe Popov, pasi dokumentet e paraqitura hedhin dyshime në identitetin e vërtetë të tyre”.

Prokurori shtetëror i Malit të Zi, Milivoje Katniq i hodhi poshtë pretendimet e avokatëve mbrojtës duke theksuar se “kjo është një përpjekje për zvarritjen e këtij procesi gjyqësor”.

Ai tha se “prokuroria ka paraqitur të gjitha të dhënat valide për të dyshuarit rus, Shishmakov dhe Popov duke përfshirë këtu edhe fotokopjet e dokumenteve të tyre personale”.

Procesi gjyqësor do të vazhdojë të enjten ku pritet që për herë të parë të dëshmojë edhe dëshmitari i mbrojtur Sasha Singjeliq.

Procesi gjyqësor në Podgoricë, i cili po mbahet nën masat e rrepta të sigurisë cilësohet si procesi më i madh në rajonin e Ballkanit për shkak edhe të implikimit rus në këto ngjarje.

Në të kaluarën Moska ka qenë jo vetëm kritikuese e ashpër e hyrjes së Malit të Zi në NATO por jo rrallë herë kishte kërcënuar ish republikën jugosllave nëpërmjet zyrtarëve rusë, që të mos bashkohet me NATO-n.

Në zgjedhjet parlamentare të tetorit të vitit të kaluar në Mal të Zi pati përpjekje për një grusht shtet, ndërsa zyrtarët malazezë fajësuan Moskën se qëndron prapa komplotit.