Presidenti i Maqedonisë së Veriut, Stevo Pendarovski, ka postuar një fotografi të pjesëtarëve të ARM-së, të cilët ndihmuan në shpëtimin e një fëmije 5-vjeçar nga rrënojat e tërmetit në Turqi.

“Këta janë pjesëtarët e ushtrisë tonë që së bashku me ekipet turke e shpëtuan Sulejmanin e vogël nga rrënojat pas tërmeteve të forta në Turqi”, ka shkruar Perndarovski në Facebook.

Ministria e Mbrojtjes së Maqedonisë së Veriut dje njoftoi se ekipi i ushtrisë të dërguar për ndihmë në Turqi ka arritur të shpëtojë një fëmijë pesëvjeçar.

“Ekipi i ushtrisë së Maqedonisë së Veriut, i cili është angazhuar në kërkimin në terren, gjetjen dhe nxjerrjen e të mbijetuarve të mundshëm në qytetin e Kahramanmarashit pasdite, asistoi në një operacion të suksesshëm për të shpëtuar nga rrënojat jetën e një të riu”.

“Ekipi ynë i ushtrisë pasi mësoi se nën rrënoja dëgjoheshin zëra, pas 6 orësh pastrimi të rrënojave, dëgjuan zërin e një fëmije, pas së cilës, së bashku me ekipin turk të kërkimit dhe pas katër orësh angazhim maksimal, kanë arritur të nxjerrin nga rrënojat Sulejmanin pesëvjeçar”, njoftuan nga Ministria e Mbrojtjes.