Një kandidat i pavarur proevropian në presidencialet serbe, denoncoi parregullsitë skandaloze në zgjedhjet e 2 prillit, të fituara nga kryeministri Aleksandar Vuçiq.

Megjithatë, këto akuza u refuzuan menjëherë nga lideri serb që i konsideroi ”gënjeshtra të trasha”.

Demonstrime me pjesëmarrjen e mijëra personave po zhvillohen që prej një jave në Beograd dhe qytete të tjera për të protestuar kundër zgjedhjes së Vuçiqit që në raundin e parë të presidencialeve.

Por, kjo është hera e parë që një nga kundërshtarët e tij dënon hapur parregullsitë në numërimin e votave.

Sasha Jankoviç, rivali kryesor i Vuçiqit, fitoi 16 për qind të votave.

”Ai i ka kërkuar Komisionit Elektoral të numërojë votat”, tha zyra e tij e shtypit.

Jankoviç tha se vetëm në një rast, nga 25 kuti të numëruara, Aleksandar Vuçiqit i ishin dhënë 964 vota më shumë.

“Parregullsitë janë skandaloze”, theksoi ai.

Duke reaguar për akuzat e bëra, Vuçiq u ankua për nivelin qesharak që kundërshtari i tij zotëronte në matematikë.

“I propozoj Komisionit Elektoral t’i hapim ato kuti dhe t’i numërojmë votat në prani të gazetarëve”, tha Vuçiq në një konferencë shtypi.