“Spitali Gjinekologjik në Çair do të vazhdojë me punë, ndërsa në sezonin e ardhshëm do të fillojë të ngrohet me gaz”.

Këtë sot e deklaroi ministri i Shëndetësisë Venko Filipçe, në lidhje me vërejtjen që dje Bashkia e Shkupit e dërgoi për Spitalin në Çair, përcjell Telegrafi Maqedoni.

“Gjatë vitit të kaluar kemi ndërmarrë hapa të caktuar për ndryshimin e sistemit për ngrohje në disa institucione shëndetësore publike. Prioritet e kemi Spitalin e Posaçëm për Gjinekologji dhe Obstetrikë “Nënë Tereza” në Çair, si dhe spitalet e përgjithshme në Kumanovë dhe Strumicë”, deklaroi ministri i Shëndetësisë Venko Filipçe.

Ai shtoi se projektet janë të gatshme, kanë hyrë në planin e furnizimeve publike dhe do të fillojnë të realizohen si prioritet pikërisht në këto tre institucione shëndetësore publike.

“Shpresoj se aq sa zgjat procedura e tenderit dhe të gjitha afatet ligjore do të kalojnë pa asnjë problem dhe për një kohë të shkurtë, duke filluar nga sezoni i ardhshëm i ngrohjes gjithë këto objekte do të përgatiten për ngrohje me gaz”, tha Venko Filipçe, ministër i shëndetësisë.

Ndryshe, dje Bashkia e Shkupit lëshoi komunikatë ku theksoi se ekziston mundësia që Spitali Gjinekologjik në Çair të mbyllet nëse vazhdon të përdorë mazutin si lëndë për ngrohej.