Si pranvera do të na bëjë më të shëndetshëm dhe të lumtur

11:46 | 4 Prill 2020

Lajmi i mirë në këtë periudhë krize është pranvera! Një pjesë e mirë e botës ka mirëpritur gjelbërimin, zogjtë, lulet, temperaturat në rritje dhe çeljen e pemëve. Ora ndryshoi dhe dita është më e gjatë. Këtë vit, si asnjëherë tjetër njerëzit i kanë sytë nga kjo stinë, me shpresën se ardhja e saj do të bëjë që koronavirusi të ndalojë. Përveç kësaj, ata që janë të shëndetshëm luten që të shijojnë ditët e gjata dhe optimizmin e kësaj stine sa më shpejt dhe izolimi i gjatë të marrë fund.

Shkencëtarë nga universiteti i Pennsylvania, pas studimeve të kryera kanë arritur në përfundimin se ardhja e pranverës i bën njerëzit më të motivuar për jetën, duke e konsideruar “si fillim të ri e të freskët”. Kjo stinë, i bën njerëzit të mendojnë se “pavarësisht sa të ngatërruara ishin gjërat, do të bëhen më mirë tani”. Sipas tyre, është momenti më i mirë për të nisur diçka të re, apo për të hequr dorë nga një ves i dëmshëm.

Momentet e para të ardhjes së pranverës na bëjnë ta shohim tablonë të plotë, me më shumë optimizëm dhe më të qartë.

Pranvera na çliron gjithashtu nga trishtimi i muajve të gjatë dimrit, pasi mungesa e dritës bën që humori i njerëzve të jetë gri në pjesën më të madhe të kohës.

Njerëzit janë evoluar në vende tropikale, ku ka shumë dritë dhe diell dhe kjo shpjegon pse truri ynë është i prirur të kërkojë ditë si këto.

Edhe pse në izolim, është e rëndësishme që njerëzit të marrin çdo ditë dozën e dritës së pranverës. Ekspertët sugjerojnë të zgjoheni herët nga gjumi dhe të kaloni kohë në ballkonin, apo kopshtin para shtëpisë nëse keni një të tillë.

Marrja e rrezeve të diellit pranveror na bën edhe më krijues. Në 2005-ën, psikologë të Universitetit të Michigan-it, zbuluan se qëndrimi një orë e gjysmë në diell përmirëson jo vetëm humorin, por edhe kreativitetin.

Zgjatja e ditës i mbush njerëzit me optimizëm edhe pse gjendemi në izolim dhe emocionalisht të ngarkuar. Vetëm ideja që jashtë është pranverë dhe ka dritë i mbush njerëzit me shpresë. Mendoni që kur e gjithë kjo të mbarojë, ajri do të jetë më i pastër, kënga e zogjve do të shijojë më shumë, ndërsa ne do të jemi më të ngrohtë me natyrën.

Shpërndaje në rrjete sociale

Lajmet më të lexuara