Dy prindër veganë janë arrestuar në Florida të Shteteve të Bashkuara të Amerikës për shkak të keqtrajtimit familjar. Djali i tyre pesë muajsh ishte në gjendje shumë të rëndë shëndetësore, për shkak mosushqyerjes.

Çështja u zbulua pasi vogëlushi u dërgua në spital sepse nuk ndihej mirë.

“Niveli i kalciumit ishte në limitet e mbijetesës”, thanë mjekët. Robert Buskey, 31 vjeç dhe Julia French, 20 vjeç, u arrestuan në Florida pasi fëmija ishte në fund të jetës. Për shkak të fiksimit të dy prindërve për t’u ushqyer si veganë, edhe fëmija ushqehej vetëm me një miks patatesh. Ai u gjet me brinjë të dala, sy të futur brenda dhe kishte vështirësi për të lëvizur.

“Nuk kam parë kurrë më parë një fëmijë në të tilla kushte. Shpëtoi për mrekulli”, ka thënë për mediat lokale Lauren Watson nga policia lokale. Ndërkohë, prindërit thanë se recetën e kishin parë në internet dhe ushqyerja nuk kishte lidhje me pamundësinë ekonomike.

Prej disa kohësh, dieta vegane ka marrë kritika të vazhdueshme pasi nuk arrin të sigurojë të gjithë elementët bazë të ushqyerjes.