Dy emrat më të pëlqyer në Shqipëri, ja kuptimi i tyre

13:48 | 18 Shtator 2016
Arbresh.info

Familjet shqiptare kanë tashmë prirjen që fëmijëve të tyre t’u vendosin një emër të huaj. Statistikat e fundit nga Instituti i Statistikave bërë për emrat e fëmijëve, tregon se më të pëlqyerit për vajzat dhe djemtë janë Amelia dhe Noel.

Amelia thuhet se është një emër me prejardhje nga Portugalia. Ky emër është shumë i përdorur në vendet perëndimore, në SHBA, në Kanada, Itali, Irlandë dhe Angli. Një pjesë e mirë e këtyre emrave, si Sara, Samuel, Noel, Aleksandëra, Andon, e kanë origjinën nga librat e krishterë apo hebraikë.

Shumë artikuj për antropologjinë shpjegojnë se prejardhja e emrit Amelia mund të jetë nga Gjermania me bazë emrin e vjetër Amalia i cili me kalimin e viteve është shndërruar në Amelia.

Edhe Noel është një emër që përdoret shumë në botën perëndimore, në shtete si Zvicra, Suedia, Holanda, SHBA etj. Origjina e tij ka një baze fetare. Noel do të thotë “krishtlindje” në frëngjisht dhe shumë kohë më parë u vendosej ky emër, fëmijëve që lindnin në këtë periudhë.

INSTAT në vëzhgimin e bërë ka publikuar edhe hartën e shpërndarjes së dy emrave tashme popullor në Shqipëri. Emri Amelia duket se pëlqehet nga të gjithë prindërit shqiptarë, gjë që evidentohet edhe në shpërndarjen në hartë të këtij emri.

Përjashtim bëjnë Hasi, Kukësi, Mirdita, Puka, Kolonja dhe Gjirokastra ku emrat më të përdorur për vajzat, të paktën deri në 2014-n, janë Dea, Leandra, Emanuela dhe Aleksandra.

Edhe emri për djemtë Noel, është i përhapur thuajse në të gjithë Shqipërinë. Në hartën e shpërndarjes, veçohen, Malësia e Madhe, Tropoja, Hasi e Peqini ku mbizotërojnë emrat Erald, Ergi dhe Aron, ndërsa në Delvinë mjaft i pëlqyer mbetet ende emri Andon.