Lëvizja Vetëvendosje përmes një njoftimi për media thotë se ka intesifikuar fushatën zgjedhore në të gjitha lagjet e qytetit të Gjilanit dhe fshatrat e kësaj komune.

“Kudo po vërehet një mobilizim i përgjithshëm dhe besimi në fitoren e sigurt. VV asnjëherë, e as kësaj radhe nuk bën premtime pa mbulesë sepse qëllim i saj nuk është gënjeshtra dhe demagogjia politike, ashtu siç ka ndodhur përgjatë gjithë këtyre viteve, po thjesht programi dhe filozofia politike që sjell drejtësi, shëndetësi, shkollim dhe mirëqenie për të gjithë” , thuhet në njoftimin e VV-së.

Sipas kësaj partie, në takimet që u mbajtën në Llashticë dhe Velikincë, kandidatët e VV për deputetë, Sami Kurteshi, Hydajet Hyseni, Besa Baftiu, Ismajl Kurteshi, Arijeta Rexhepi, Shkurte Aliu dhe Nevzat Isufi, secili në fushën e vet, shpalosën programin e VV, i cili u mirëprit nga pjesëmarrësit e shumtë.

Në këto tubime sipas VV-së, po mirëpritet kandidatura e Albin Kurtit për Kryeministër të Kosovës.

“Është kandidati më i përgatitur politikisht, më i vendosur dhe më i sinqertë që ka Kosova, ndaj qytetarët e Gjilanit dhe të mbarë Kosovës po i japin mbështetje të fuqishme, gjë e cila do të dëshmohet më 11 qershor me votën e tyre”, deklaruan ndër të tjera kandidatët për deputet të VV në tubimet që u mbajtën në Llashticë dhe Velekincë.