Vujiçiq: Deputetët serbë do ta votojnë Ushtrinë e Kosovës

13:58 | 17 Shtator 2017

Kryetari i Shoqatës së Malazezëve të Kosovës, Sllobodan Vujiçiq ka deklaruar se së shpejti deputetët serbë nuk do të kenë dilemma për votimin e Ushtrisë së Kosovës.

Këtë ai e ka argumentuar në faktin se ata kanë dhënë betimin si përfaqësues të Republikës së Kosovës.

Sipas tij, krijimi i Ushtrisë së Kosovës nuk do të ishte rrezik për askënd, duke përfshirë edhe Serbinë.

“Forca e tanishme Mbrojtëse dhe e ardhmja e Armatosur e Kosovës, në partneritet me NATO-n dhe me SHBA-në, nuk do të jetë kërcënim për paqen dhe stabilitetin e vendeve në rajon, siç dëshiron ta paraqes ministri Vulin, por do të jetë e kundërta, garant i tij”, ka thënë Vujiçiq, transmeton lajmi.net

Sipas tij,serbët duhet ta votojnë Ushtrinë pasi kjo garanton siguri territorial të Kosovës dhe respektimin e Kushtetuës.

“Me këtë veprim, ata janë zotuar se do të punojnë në interes të Kosovës dhe të të gjithë qytetarëve të saj, se do të angazhohen në mbrojtjen dhe respektimin e kushtetutshmërisë dhe ligjshmërisë, në mbrojtje të tërësisë territoriale dhe integritetit institucional të Kosovës, për garantim të lirive dhe të drejtave të njeriut, në pajtim me ligjet e vendit dhe standardeve evropiane”, ka thënë ai.

Vujiçiq në fund e ka cilësuar sit ë zbrazët reagimin e Aleksandar Vulinit ndaj presidentit Thaçi i cili deklaroi se Ushtria e Kosovës do të bëhet deri në fund të vitit.